Sextug kona meðal þeirra sem notaðir voru í lánasjóðssvindli

Nöfn leikskólakennara, bókasafnsfræðings, fyrrverandi verðbréfasala og manns sem skráður er til húsa í félagsbústöðum voru notuð til að svíkja út fjörutíu milljónir króna úr Íbúðalánasjóði. Sextug kona sem notuð var í svikunum segist ekki skilja af hverju hennar nafn var notað.

Mennirnir fjórir sem nýlega var sleppt úr gæsluvarðhaldi komu sér í stjórn tveggja eignarhaldsfélaga án vitneskju stjórnenda þeirra. Svo seldu þeir tvær íbúðir sem félögin eiga í miðbæ Reykjavíkur. Þeir fölsuðu kaupsamninga, notuðu nöfn tveggja einstaklinga við kaupin og virðast þau hafa verið valin af handahófi.

Annar þeirra er fjörutíu og fimm ára og er skráður til heimilis í félagsbústöðum í Breiðholti og hin er sextug kona, bókasafnsfræðingur til heimilis í Vesturbænum. Ekki náðist í manninn en konan sagðist í samtali við fréttastofu ekki skilja hvers vegna hennar nafn hefði verið valið en vildi ekki tjá sig að öðru leyti. Þá var nafn leikskólakennara notað við gerð annars kaupsamningsins og nafn fyrrverandi verðbréfasala á Wallstreet var notað sem vottur á hinum kaupsamningnum.

Lítið sem ekkert hvílir á íbúðunum tveimur sem voru seldar. Fölsuð voru greiðslumöt til að fá lán hjá íbúðalánasjóði og greiddi hann svo út 20 milljóna króna lán fyrir hvorri íbúð.

Önnur þeirra er fimm herbergja og hundrað og fimmtíu fermetrar staðsett á Grettisgötu. Sú er metin á tæplega fimmtíu milljónir króna en hún var seld manninum á 25,8 milljónir

Hin er á Vatnsstíg, 130 fermetrar og metin á um 55 milljónir króna. Sú var seld bókasafnsfræðingnum á rúmar 25 milljónir.

Enn eru nöfn einstaklinganna tveggja þinglýst á eignirnar og lánin hafa verið fryst. Guðmundur Bjarnason framkvæmdastjóri Íbúðalánasjóðs segir sjóðinn vera fara yfir allt kerfið til að koma í veg fyrir svona svik.