Erlend lán verði færð í íslenskar krónur

Guðmundur Ólafsson, lektor í hagfræði við HÍ, segir að ríkisvaldið verði að bæta skuldurum þann skaða sem það beri ábyrgð á, spurður um skoðun hans á afskriftum skulda. Skuldir hafi hlaðist upp og að mörgu leyti hafi það verið Seðlabankanum að kenna. Sjálfsagt sé því að bæta mönnum það tjón.

Ekki kemur til greina að stilla vísitöluna á 1. janúar árið 2008 eins og einhverjir hafa viljað, að mati Guðmundar. Til dæmis af þeirri ástæðu að þá væri ráðist gegn eldra fólki sem hefur verið að spara. Flöt niðurfelling kæmi hins vegar til greina.

„Meðan erfiðast er hef ég talað fyrir því að menn borgi ekki af lánum í einhvern tíma. Síðan þegar efnahagslífið kemst á réttan kjöl á að fara að huga að bótum,“ segir Guðmundur.

Árni Páll Árnason félagsmálaráðherra viðraði hugmyndir um niðurfellingu í Fréttablaðinu á laugardag. Tvennt muni ráða niður­fellingu, greiðslugeta og veðrými. Sagði hann flata niðurfellingu ekki koma til greina.

Ásgeir Jónsson, hagfræðingur hjá Kaupþingi, vill að öllum sem eru með erlend lán verði gefinn kostur á að breyta lánum sínum í íslenskar krónur, hvort sem þau verði verðtryggð eða óverðtryggð.

„Bankarnir þurfa að aðlaga hjá sér efnahagsreikninginn og þurfa að fara yfir í krónur. Þá finnst mér eðlilegt að fólki sé boðið að skipta yfir í krónur á einhverju ákveðnu gengi.“

Bankarnir vilja ekki taka húsið af fólki sé þess nokkur annar kostur, að sögn Ásgeirs. Það er bæði óhagkvæmt og kostnaðarsamt. Vilja þeir heldur ekki sjá lán sem ekkert er greitt af. Þess vegna kæmu þessar aðgerðir bæði skuldurum og bönkum til góða.

Þórólfur Matthíasson vill að þeir sem uppfylli ákveðin skilyrði geti flutt höfuðstól láns síns í lán, sem væri á svipuðum skilmálum og námslán. Afborganir yrðu miðaðar við tekjur skuldara. Einnig væri tími gefinn þar sem lánið yrði afborgunar­laust.

Segir Þórólfur að hann viti til þess að Seðlabankinn hafi slíkar hugmyndir til skoðunar. Hag­fræðingarnir Gauti B. Eggertsson og Jón Steinsson hafa reifað svipaðar hugmyndir.vidir@frettabladid.is