Þingnefndir ræði samruna á mjólkurmarkaði

Eygló Harðardóttir, þingmaður Framsóknarflokksins, hefur óskað eftir sameiginlegum fundi viðskiptanefndar og sjávarútvegs- og landbúnaðarnefndar vegna samruna Mjólku og Kaupfélags Skagfirðinga og athugasemda Samkeppniseftirlitsins vegna samrunans. Þar segir að minni samkeppni þýði hærra verð fyrir neytendur og lægri greiðslur til bænda. Eygló segir brýnt að þingnefndirnar fari yfir málið.

Mjólka, sem hefur verið sjálfstætt félag á mjólkurmarkaði, hefur glímt við rekstrarvanda. Félagið hefur nú runnið inn í Kaupfélag Skagfirðinga. Samkeppniseftirlitið getur ekki komið í veg fyrir samrunann, enda þótt hann teljist samkeppnishamlandi. Það skýrist af því að búvörulög ganga samkeppnislögum framar.

Eygló vill að á fundinn komi fulltrúar viðkomandi ráðuneyta, Bændasamtakanna, Samkeppniseftirlitsins og fulltrúa Mjólku og Kaupfélags Skagfirðinga.