Stjórnvöld í Venesúela í stríði við fjölmiðla

Stjórnvöld í Venesúela hafa lokað yfir 30 útvarpsstöðvum síðasta mánuðinn og von er á að minnsta kosti jafnmörgum lokunum til viðbótar.

Háværar mótmælaraddir hafa heyrst í höfuðborginni Caracas og gengu mótmælendur fylktu liði um götur borgarinnar á föstudag til að vekja athygli á því sem þeir kalla aðför stjórnvalda að tjáningarfrelsinu. Ráðherra fjarskiptamála, Diosdado Cabello, segir að stöðvarnar sem lokað hafi verið, 32 útvarpsstöðvar og tvær sjónvarpsstöðvar, hafi einfaldlega ekki uppfyllt þau skilyrði sem sett eru fyrir útsendingarleyfi og það sama gildi um tæplega 30 aðrar sem lokað verði á næstu dögum.

Þá hafa stjórnvöld stefnt sjónvarpsstöðinni Globovision en stjórnendum hennar er gefið að sök að hafa beinlínis hvatt til frekari mótmæla gegn Hugo Chavez, forseta landsins, í fréttaumfjöllun um nýafstaðin mótmæli. Á þessu segir Cabello sjónvarpsstöðina þurfa að axla ábyrgð en einnig sé til rannsóknar hvort Globovision hafi brotið lög í byrjun maí þegar stöðin greindi frá jarðskjálfta áður en opinber tilkynning hafði verið gefin út um skjálftann.

Einkareknir fjölmiðlar hafa átt erfitt uppdráttar í Venesúela síðan Hugo Chavez settist í forsetastólinn og hefur hann oft sakað þá um að vinna gegn stjórnvöldum landsins.