Evrópusambandið sendir óvopnaða eftirlitsmenn til Georgíu

Utanríkisráðherrar Evrópusambandsins ákváðu í dag að senda óvopnaða eftirlitsmenn til Georgíu til að fylgjast með því að Rússar virði samkomulag um að draga heri sína frá Georgíu. Þá vilja ráðherrarnir láta rannsaka hverjir hafi átt upptökin að átökunum í síðasta mánuði.

 

Rússar halda því staðfastlega fram að Georgíuher hafi átt upphafið að átökunum í Georgíu með því sem þeir kalla þjóðarmorð í Suður-Ossetíu. Ráðherrar ESB-ríkjanna sögðu í dag að best væri að rannsaka málið svo þetta fari ekki á milli mála.

 

 

 

Evrópusambandslöndin saka Rússa um að vanvirða samkomulagið sem Sarkozy Frakklandsforseti fékk bæði Medvedev forseta Rússlands og Saakashvili forseta Georgíu til að undirrita. Samkvæmt því áttu rússneskir hermenn að fara á brott frá öðrum svæðum en aðskilnaðarhéruðunum tveimur.

 

Bandarískt herskip liggur nú við akkeri fyrir utan höfnina í Poti í Georgíu, fullt af hjálpargögnum fyrir Georgíu. En Rússar eru með herflokka í Poti og segjast ætla að skoða alla gáma sem þangað berast. Svo gæti því farið að bandarískir sjóliðar með hjálpargögn fyrir Georgíumenn þurfi fyrst að fara í gegnum eftirlit rússneskra hermanna. Og þá má ekki mikið fara úrskeiðis svo ekki sjóði uppúr.