Veitt úr Dungalssjóði

Í gær voru veitt árleg verðlaun úr Dungals-sjóði sem Gunnar Dungal og Þórdís Sigurðardóttir stofnuðu til minningar um Margréti og Baldvin Dungal kaupmann. Sjóðurinn hefur árlega styrkt unga myndlistarmenn til dáða með fjárhæð.

Að þessu sinni ákvað dómnefndin að veita þrjá styrki, tvo að upphæð kr. 300.000: Ragnari Jónassyni, Sirru (Sigrúnu Sigurðardóttur) og Bjarka Bragasyni sem fær 500.000 í styrk. Öll eru þau útskrifuð frá Listaháskóla Íslands og sóttu sér framhaldsnám til erlendra og innlendra stofnana; Ragnar við Glascow School of Arts, Sirra við Háskóla Íslands, og Bjarki hóf í haust nám við Cal Arts í Los Angeles.

Ragnar er ekki málari í hefðbundnum skilningi. Nær er að segja að hann vinni með eiginleika málverks. Hann vinnur jöfnum höndum með tvívíð og þrívíð verk. Útkoman eru litskrúðug efniskennd verk oft án striga eða undirlags sem tengja sig beint við sýningarrýmið. Með sérstæðum litum og formum nær hann að skapa heim sem hefur skírskotun til litagleði popplistar sjöunda áratugarins.

Sirra skapar innsetningar þar sem hún tengir saman ólík efni eins og veggmálverk, spegla, gler, ljós, og vídeómyndir. Mörg verka hennar setja valda ljósgjafa og tvívíða hluti í þrívíða nálgun þar sem verkið sjálft, umhverfi þess og rými mynda eina heild. Hún sækir efnivið sinn meðal annars í tölulegar staðreyndir, vísindakenningar og rannsóknir. Með myndvörpum og speglum býr hún til hreyfingu í innsetningum sínum sem framkalla sjónhverfingu, einhvers konar aflvaka sem hrífur áhorfandann með sér á vit upplifunar. Úr öllu þessu tekst henni að skapa persónulegan myndheim.

Á þeim stutta tíma sem leið frá því Bjarki útskrifaðist frá Listaháskóla Íslands þar til hann hóf framhaldsnám í Bandaríkjunum tók hann þátt í fjölda sýninga á Íslandi og erlendis, nú síðast Listahátíð í sumar. Hann kenndi og hélt fyrirlestra við Listaháskóla Íslands, Listaháskólann í Bergen og í Vilníus. Árið 2005 bjó hann einnig og vann að myndlist í Berlín. Með náminu vinnur Bjarki að sýningarverkefnum bæði á Íslandi og í Bandaríkjunum. Hann hyggur á vinnustofudvöl í Kaliforníu og Finnlandi á næsta ári. Í myndlist sinni skoðar Bjarki samhengi og tengsl ólíkra hluta. Hann segir: „Ég skoða umhverfi mitt í gegnum myndlist, en að móta umhverfi innan þess er mikilvægara. Ég vinn í mörgum mismunandi miðlum, en bakgrunnur minn er í arkitektúr og teikningu. Í nýjustu verkum mínum og verkefnum sem eru í gangi í augnablikinu er ég að skoða þýðingu, tungumál og allt það sem misskilst og hvernig það öðlast sjálfsstætt rými."

Afhending styrkjanna fór fram í gær í Listasafni Reykjavíkur þangað sem þessir listamenn eiga vafalítið eftir að leita með verk sín til sýninga. pbb@frettabladid.is