Innlent

Vilhjálmur fór út bakdyramegin - Trúnaðarbrestur hjá Degi og Ólafi

Vilhjálmur Þ. Vilhjálmsson, formaður borgarráðs, fór út bakdyramegin eftir að borgarráðsfundi lauk og ræddi því ekki við fjölmiðlamenn sem biðu hans utan fundarherbergis. Þetta kom í ljós þegar herbergið var opnað. Sömu leið virðast Kjartan Magnússon og Júlíus Vífill Ingvarsson hafa farið.

Vilhjálmur segir það sjálfur alrangt að hann hafi farið út bakdyramegin heldur hafi hann setið ásamt þremur öðrum borgarfulltrúum í hliðarherbergi eftir að fundi borgarráðs lauk og eftir það hafi hann farið upp á skrifstofu sína og þaðan út um aðaldyrnar.

Dagur B. Eggertsson, oddviti Samfylkingarinnar, segir að trúnaðarbrestur hafi orðið á milli sín og Ólafs F. Magnússonar borgarstjóra þegar núverandi meirihluti var myndaður. Erfitt sé að vinna það traust til baka.

Dagur var inntur eftir stöðu mála í borginni eftir borgarráðsfundinn. Hann minnti á að hann hefði sagt við myndun núverandi meirihluta að kjósa ætti í borginni og sagðist Dagur enn þeirrar skoðunar. Enn fremur sagði hann um stöðuna í borginni að annaðhvort væri þetta hefðbundið klúður hjá sjálfstæðismönnum eða þá að þeir væru að beita klækjabrögðum. Stjórnarkreppa hefði verið í borginni frá því að sjálfstæðismenn og F-listi tóku við.

Aðspurður um þá hugmynd að Ólafur dragi sig út úr borgarstjórn og Margrét Sverrisdóttir komi inn í stað hans og að myndaður verði nýr Tjarnarkvartett sagði Dagur að Ólafur yrði sjálfur að ákveða hvort hann hyrfi á braut.

Athygli vakti að hvorki Hanna Birna Kristjánsdóttir, oddviti sjálfstæðismanna, né Ólafur F. Magnússon borgarstjóri sátu fund borgarráðs.






Tengdar fréttir

Neitar þreifingum við sjálfstæðismenn

Óskar Bergsson, borgarfulltrúi Framsóknarflokksins neitaði því í morgun að þreifingar hefðu staðið yfir undanfarna daga á milli hans og sjálfstæðismanna um nýjan meirihluta í borginni.

Jakob væntir tíðinda síðar í dag

„Borgarstjóri verður að útskýra það sjálfur,“ segir Jakob Frímann Magnússon, miðborgarstjóri og helsti ráðgjafi Ólafs F. Magnússonar, aðspurður hvers vegna Ólafur F. Magnússon mætti ekki á borgarráðsfund í morgun eins og venjan er. „Það skýrir sig væntanlega sjálft síðar í dag,“ bætti Jakob við.

Fundað beggja vegna Tjarnargötunnar

Minnihluti og meirihluti í borgarstjórn sitja nú á fundum hvor sínum megin við Tjarnargötuna til þess að fara yfir atburði undanfarinna.

Brot á samstarfssamningi semji Óskar við sjálfstæðismenn

Þorleifur Gunnlaugsson, borgarfulltrúi Vinstri - grænna, segir að Óskar Bergsson, borgarfulltrúi Framsóknarflokksins, hafi á fundi minnihlutans í morgun fullvissað samstarfsmenn sína um að hann ætti ekki í neinum viðræðum við sjálfstæðismenn um meirihlutasamstarf. Fundi borgarráðs í Ráðhúsinu er um það bil að ljúka.

Útlit fyrir nýjan meirihluta í borginni í dag

Líklegra þykir en ekki að Sjálfstæðisflokkurinn slíti meirihlutasamstarfi sínu við Ólaf F. Magnússon og F-listann í borgarstjórn og leiti samstarfs við Óskar Bergsson, borgarfulltrúa Framsóknarflokksins.

Oddvitar meirihlutans ekki á borgarráðsfundi

Nú þegar kortér er síðan fundur borgarráðs átti að hefjast eru hvorki Ólafur F. Magnússon borgarstjóri né Hanna Birna Kristjánsdóttir, oddviti sjálfstæðismanna, mætt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×