Alþýðukona leggur útrásarforsetann

„Jú, jú, þetta eru nánast landráð. Og ég vona að forsetinn fyrirgefi mér þetta,“ segir Sigmundur Ernir Rúnarsson, rithöfundur og sjónvarpsmaður. Og bætir við: „En það er í takt við tíðarandann að alþýðukona leggi útrásarforsetann.“

Nú er bardaginn um bóksöluna að ná hámarki. Og bókaútgefendur eru ánægðir, sala bóka fer fram úr björtustu vonum og stefnir í að Arnaldur Indriðason slái enn eitt metið og fari jafnvel yfir 30 þúsund seld eintök. Og sala bókar Sigmundar um Magneu Guðmundsdóttur, óþekktu alþýðukonuna, hefur farið fram úr björtustu vonum og er mest selda ævisagan. Saga af forseta eftir Guðjón Friðriksson er í öðru sæti – óvænt.

Útgefandinn Pétur Már Ólafsson hjá Veröld er kátur. „Við þóttum býsna djörf að prenta 5.000 eintök af Magneu í upphafi en viðtökurnar hafa verið langt umfram væntingar; mest selda ævisagan, besta ævisagan að mati starfsfólks bókaverslana – og í dag kemur hressileg viðbótarprentun á lager.“ Pétur Már dregur ekki úr því að bjart sé yfir Veröldinni. Og upplýsir að Auðn Yrsu Sigurðardóttur sé á fljúgandi siglingu. „Við létum prenta risaupplag af Auðninni fyrr í haust, 10.000 eintök, og þótti óðsmanns æði.

En… við fengum nú fyrir helgina myndarlega viðbót á lager úr Odda, enda fyrsta prentun á þrotum. Það stefnir því í algjört met hjá Yrsu og ætti bókin að seljast í um 13.000 eintökum.“