Kaupmenn takmarki hækkanir á vörum

Stjórn Verkalýðsfélags Akraness lýsir yfir gríðarlegum áhyggjum yfir stöðu efnahagsmála vegna mikillar verðbólgu og himinhárra vaxta, sem eru að sliga mörg íslensk heimili.

Skorar stjórnin á alla verslunareigendur og stórkaupmenn að takmarka hækkanir á vörum sínum eins og kostur er og leggja þannig sitt af mörkum við að vinna bug á þeirri gríðarlegu verðbólgu sem sé í landinu.

Í tilkynningu frá verkalýðsfélaginu segir enn fremur að gengið hafi verið frá hófstilltum kjarasamningum til að stuðla að stöðugleika en það sé morgunljóst að fátt geti komið í veg fyrir að samningunum verði sagt upp í febrúar þegar endurskoðun á þeim fer fram. „Það er einnig ljóst að íslenskt verkafólk mun ekki sætta sig við að gera hófstillta kjarasamninga slag í slag til að tryggja hér stöðugleika þegar lítið sem ekkert kemur frá ríkisstjórn Íslands í þeim efnum," segir stjórn Verkalýðsfélags Akraness enn fremur.

Auk þess að skora á kaupmenn hvetur verkalýðsfélagið ríkisstjórnina til þess að lækka álögur á eldsneyti vegna mikillar hækkunar á heimsmarkaðsverði. Slíkt muni klárlega hjálpa íslenskum neytendum og slái á verðbólguna. Einnig skorar stjórn félagsins á stjórnvöld að grípa þegar til aðgerða til að koma í veg fyrir vaxandi atvinnuleysi.