Nánast útilokað að seinagangur í nauðgunarmálum endurtaki sig

Hörður Jóhannesson, aðstoðarlögreglustjóri höfuðborgarsvæðisins, segir nánast útilokað að sá seinagangur í rannsókn sem varð til þess að dæmdur nauðgari fékk vægari dóm í Hæstarétti geti endurtekið sig.

Maðurinn var kærður fyrir nauðgun árið 2003. Hann neitaði sök en rannsókn á lífsýnum leiddi sekt hans í ljós. Hann var þá búinn að yfirgefa landið og í stað þess að gefa út handtökuskipun lét lögreglan nægja að spyrjast fyrir eftir honum hjá lögregluyfirvöldum ytra.

Eins og fram kom í fréttum stöðvar tvö í gær liðu fjögur ár þangað til maðurinn var loks færður til skýrslutöku í Danmörku og í gær var hann dæmdur í 15 mánaða fangelsis í Hæstarétti. Vegna seinagangs í rannsókn lögreglu þarf maðurinn hins vegar aðeins að afplána þrjá af þessum fimmtán mánuðum.

„Það er réttilega fundið að því að málið var of lengi í meðferð og við tökum það að sjálfsögðu alvarlega. En það sem skiptir meira máli er að eftir að nýtt skipulag tók gildi hér 1. janúar 2007 þá er búið gera ráðstafanir sem fyrirbyggja að svona á ekki að geta gerst aftur," segir Hörður Jóhannesson, aðstoðarlögreglustjóri.

„Eitt af því sem við gerðum strax var sjá til þess að þessi málaflokkur væri í sérstakri meðferð og stofnuðum sérstaka deild til þess. Það leiðir til þess að öll tiltæk úrræði eru nú notuð," segir Hörður ennfremur.

Aðspurður hvort lögreglan geti dregið einhvern lærdóm af þessum dómi segir Hörður: „Ekki annað en það að það er aukin pressa á að það séu notuð öll úrræði. Það er hægt að gefa út handtökuskipun og lýsa eftir mönnum og það er það sem við gerum í dag."