Slagsmál í háloftunum

Leggja þurfti lykkju á leið írskrar flugvélar sem var á leið frá Dublin til Krítar í nótt þar sem slagsmál hófust um borð í vélinni. Var lent í Feneyjum þar sem flugdólgunum, fimm að tölu, var hent úr vélinni í hendur lögreglu.

Einn af farþegum vélarinnar sagði við fréttastofu Sky að flugdólgarnir hafi verið mjög árasagjarnir, tveir þeirra hafi byrjað slagsmál og einn byrjað að mölva farangursrými fyrir ofan höfuð fólks. Flugdólgarnir hafi einnig haft áfengi um hönd.

Mennirnir voru írskir og á milli 25-30 ára gamlir. Sendi ítalska lögreglan þá aftur heim á leið.