Réðst á lögreglu eftir að hafa lagt hendur á fyrrverandi sambýliskonu

Ráðist var á lögreglumenn í Vestmannaeyjum í síðustu viku þegar þeir voru kallaðir til vegna heimilisófriðar.

Fyrrverandi sambýlismaður konu sem býr í bænum hafði hafði ruðst inn í hús hennar og lagt á hana hendur. Þegar lögreglan kom á staðinn var maðurinn fyrir utan húsið og þegar ræða átti við manninn brást hann illa við og réðst á lögreglumennina sem þarna voru að störfum. Maðurinn var því handtekinn og færður í fangageymslu.

Þá réðst annar maður til inngöngu í annað hús í bænum og var með hótanir gagnvart húsráðanda. Mun ástæðan fyrir þessari uppákomu hafa verið áhyggjur þess sem ruddist inn að húsráðandi gæti ekki staðið við skuldbindingar sínar varðandi húsakaupin.