Fær uppbyggilega gagnrýni frá Ladda

„Nú er ég bara að njóta sólarinnar. Ég er að bíða eftir að fá klippt uppistandið sem ég var með á Nasa sem heitir: Fyndinn í fyrra. Ég lét taka sýninguna upp því ég ætla að koma þessu á DVD," svarar Þórhallur Þórhallsson þegar Vísir spyr hvað hann aðhefst í sumar.

„Ég þarf að fara á hnén og grátbiðja útgefendur að gefa út sýninguna en ég er búinn að setja brot inn á netið og hef fengið góð viðbrögð við því. Í sýningunni geri ég aðallega grín að sjálfum mér og aðstæðum sem ég hef lent í og hvað ég var vitlaus sem krakki."

Gefur pabbi (Laddi) þér góð ráð?

„Já hann kom á sýninguna og fannst þetta mjög gott. Var mjög stoltur af stráknum. Það er nú bara uppbyggileg gagnrýni sem ég fæ frá honum. Gott að geta fengið ráð frá gamla karlinum."

„Nei, ég meina reynda karlinum," segir Þórhallur.

Sjá brot úr sýningu Þórhalls hér.