Krepputilboð handa Ameríkönum í Feneyjum

Hið fornfræga veitingahús Harry's Bar í Feneyjum, þar sem rithöfundurinn Ernest Hemingway sat löngum stundum að áti og stífri martini-drykkju, býður amerískum ferðamönnum nú rausnarlegt krepputilboð til huggunar þegar bandaríkjadalur stendur höllum fæti gagnvart evrunni.

Á skilti utan við staðinn er ritað: „Harry's Bar í Feneyjum býður amerískum fórnarlömbum rándýrra lána nú 20% afslátt af öllum réttum á matseðlinum á meðan ástandið jafnar sig." Að sögn eiganda staðarins hefur amerískum viðskiptavinum fækkað verulega síðustu mánuði enda fást nú eingöngu 0,64 evrur fyrir bandaríkjadal á móti 1,10 árið 2002.

Ferðamálaráð Ítalíu gaf það út í nýlegri skýrslu að staða bandaríkjadals gagnvart evru væri um þessar mundir stærsta hindrunin á ferðamannastraumi frá Bandaríkjunum til Evrópu. Tilboð Harry's Bar á sér sögulegar rætur þar sem barinn var opnaður árið 1931 fyrir peninga sem barþjónn á hóteli í Feneyjum fékk að gjöf frá Bandaríkjamanninum Harry Pickering til að greiða af láni. Barþjónninn skírði barinn og son sinn í höfuðið á Harry en sonurinn, Arrigo, á og rekur barinn nú.

Rithöfundurinn Ernest Hemingway kom Harry's Bar á kortið þegar hann nefndi hann á nafn í skáldsögunni Across the River and into the Trees sem kom út árið 1950 en barinn var helsta afdrep Hemingways í Feneyjum.

Reuters greindi frá.