Framkvæmdir hafnar í Helguvík

Fyrstu framkvæmdir vega fyrirhugaðrar álversbyggingar við Helguvík á Reykjanesi, hófust í morgun.

Það eru jarðvegframkvæmdir vegna girðingar umhverfis svæðið og vegalagningar inn á það. Framkvæmdaleyfið var staðfest í fyrrakvöld og ætlar Norðurál ekki að bíða boðanna enda er þegar búið að tryggja næga raforku til starfsseminnar.

„Þetta er ánægjulegur áfangi sem markar þáttaskil í löngu undirbúningsferli," segir Ragnar Guðmundsson, forstjóri Norðuráls í tilkynningu . „Við höfum fundið fyrir gríðarlegum áhuga og stuðningi í samfélaginu og hlökkum til að vinna með heimamönnum að þessu verkefni. Þeir hafa stutt okkur og hvatt ötullega frá upphafi."

Líkt og álver Norðuráls á Grundartanga veður álverið í Helguvík byggt í áföngum þannig að fyrirtækið vaxi hóflegum skrefum fyrir íslenskt hagkerfi. Áætlað er að fyrsta áfanga framkvæmda verði lokið árið 2010 og að framleiðslugeta álversins verði þá um 150.000 tonn á ári. Öðrum áfanga á að verða lokið árið 2015 og verður framleiðslugetan þá komin í 250.000 tonn. Áformað er að hefja álframleiðslu í Helguvík síðla árs 2010.