Enginn starfsmaður lögreglunnar aðstoðaði Annþór

Ekki er grunur um að starfsmenn lögreglunnar á höfuðborgarsvæðinu hafi komið að flótta Annþórs Kristjáns Karlssonar úr fangelsi á föstudag með refsiverðum hætti. Eftirlit með fanganum var ekki í samræmi við gildandi verklagsreglur. Þetta kemur fram í tilkynningu lögreglunnar sem enn hefur ekki lokið rannsókn á málinu þrátt fyrir að hafa ítrekað sagt að rannsóknin væri á lokastigi.

Lögregla segir að ítarleg innanhúsrannsókn hafi farið fram á þeim atriðum sem úrskeiðis fóru og leiddu til þess að Annþór slapp úr fangageymslum lögreglunnar við Hverfisgötu. Segir lögregla að rannsóknin standi enn yfir og að kröfu lögreglustjóra sé verið að afla frekari gagna auk þess sem nánar er verið að fara yfir alla þætti málsins, frá móttöku fangans deginum áður, til framkvæmdar vistunar, eftirlits, skráningar og fleira.

Lögregla segir að þegar liggi fyrir að að móttaka, vistun og eftirlit með fanganum hafi ekki verið í samræmi við gildandi verklagsreglur. Einnig liggi fyrir að fanganum fylgdu ekki nauðsynlegar upplýsingar um tilhögun og framkvæmd vistunar. Hins vegar séu ekki uppi grunsemdir um að starfsmenn embættisins hafi komið að málinu með refsiverðum hætti.

Þá hefur lögreglustjóri einnig ákveðið að flýta fyrirhugaðri úttekt innri endurskoðunar embættisins á starfsemi fangamóttöku lögreglunnar á höfuðborgarsvæpinu en hún átti ekki að vera á dagskrá fyrr en síðar á þessu ári. „Í þeirri athugun, sem þegar er hafin, verður farið heildstætt yfir móttöku fanga hjá embættinu og gengið úr skugga um að sú móttaka sé eins og reglur kveða á um. Úttekt innri endurskoðunar LRH mun ná til allra þátta sem snerta móttöku, vistun og meðferð fanga hjá lögreglunni á höfuðborgarsvæðinu," segir í tilkynningu lögreglunnar.