Vígtennurnar sýndar

Verkalýðshreyfingin brýnir nú klærnar og tók í dag fyrstu skref til undirbúnings átökum á vinnumarkaði með því að vísa kjaradeilu sinni við atvinnurekendur til ríkissáttasemjara.

Ásmundur Stefánsson ríkissáttasemjari var kallaður til verka þegar við upphaf samningafundar í morgun með sérstakri yfirlýsingu.

Með því að fela ríkissáttasemjara að stýra viðræðum hafa Flóabandalagið og Starfsgreinasambandið, sem semja fyrir hönd 40 þúsund launþega, skapað forsendur til verkfallsboðunar því skilyrði fyrir boðun vinnustöðvunar er að sáttasemjari hafi áður reynt að miðla málum. Og menn láta skína í vígtennurnar. Kristján Gunnarsson, formaður Starfsgreinasambandsins, segir að kveikjuþráðurinn sé orðinn stuttur og ekki verði beðið lengi með að setja aukinn þrýsting, komi ekkert frá atvinnurekendum.

Vilhjálmur Egilsson, talsmaður atvinnurekenda, er hins vegar pollrólegur, og segir að ekki verði staðið upp frá borðum fyrr en menn sjái eitthvað jákvætt framundan.