Guðni: Nú verða allir að sýna ábyrgð

Það væri alveg ljóst að hér væru menn að leggja af stað með öll þau tæki og tól sem yrðu í björgunarbát til þess að bjarga þjóðarskútunni. Guðni sagði þetta annars konar hamfarir en gengið hefðu yfir Íslendinga en gamla fólkið myndi eftir peningakreppu. Það væri hins vegar algjörlega ljóst að það hefði enginn maður farist í þessum hamförum. Við byggjum við þá gæfu að vera rík þjóð og þyrftum að eignast einn þjóðarvilja og eina þjóðarsál þannig við gætum á sem allra skemmstum tíma fengið byr í seglin. Við ættum hafið og landið og hefðum sótt mikinn auð þangað.

Guðni benti á að Íslendingar gætu hraðað þeim stóru verkefnum sem væru í undirbúningi, þar á meðal álver í Helguvík og Húsavík. Skammtímavandinn væri hins vegar stór og hann gerði kröfu til þess að allir sýndu ábrygð, líka þeir sem hefðu farið offari á vegferð heimsins. Þeir menn yrðu að koma til samstarfs við ríkisstjórnina við að vinna að vandanum.

Guðni sagðist samt ekki getað gert annað en að rifja það upp sem framsóknarmenn hefðu varað við, þessum vanda. Þeir hefðu gagnrýnt ríkisstjórnina frá því að hún hóf störf. Flokkurinn hefði gagnrýnt aðgerðaleysið sem ríkisstjórnin hefði sýnt í kreppunni sem hefði fæðst fyrir um 15 mánuðum. Þá hefði verið ljóst í Bandaríkjunum að hið ódýra fjármagn væri runnið til þurrðar.

Guðni sagði þó verkefnið aðeins eitt, að lágmarka skaðann og nú væri um að gera að slíðra sverðin. Hann tryði því að Íslendingar hefðu manndóm og styrk til þess að börnin og komandi kynslóðir sætu ekki áratugum saman í miklum vandamálum. Við værum meistarar að vinna okkur úr kreppu og erfiðleikum og lauk Guðni ræðu sinni á orðunum: „Ýtum úr vör í drottnins nafni."