Fólk vaknaði við skjálfta á Suðurlandi

Sunnlendingar vöknuðu upp við jarðskjálfta upp á 3,3 á á Richter rétt fyrir klukkan hálfsjö í morgun með upptök í norðanverðu Ingólfsfjalli.

Hann var á fimm kílómetra dýpi og fannst vel á Selfossi og í Hveragerði, jafnvel svo að fólk vaknaði við hann. Þrír minni skjálftar upp á um það bil einn á Richter hver hafa mælst í kjölfarið en nú er orðið rólegt á svæðinu á ný.

Að sögn jarðvísindamanna Veðurstofunnar eru þetta eftirskjálftar eftir Suðurlandsskjálftann sem varð þann 29. maí síðastliðinn. Skjálftarnir nú koma jarðvísindamönnum ekki á óvart og þeir búast ekkert frekar við fleiri skjálftum á svæðinu í bráð en nokkrir skjálftar urðu á sömu slóðum í síðustu viku.

Þeir voru allir vægari en skjálftinn í morgun og varð fólk lítið sem ekkert vart við þá. Að öðru leyti er hvergi óvenjuleg skjálftavirkni á landinu þessa stundina.