Skaftárhlaup með þeim stærstu í manna minnum

Hlaupið í Skaftá er með þeim stærstu í manna minnum. Það á upptök sín í hitakatli undir Vatnajökli og sendir nú tuttugufalt meðalrennsli niður eftir farveginum til sjávar. Búist er við að flóðið nái hámarki í byggð í kvöld en þegar sjást merki þess að byrjað sé að sljákka í ánni inni á hálendi.

Snemma í morgun mældist rennslið þar 1.340 rúmetrar á sekúndu, eða tuttugufalt meðalrennsli. Áin flæðir nú yfir veginn að bænum Skaftárdal og er leiðin ófær þangað. Þá er talið líklegt að áin flæði líka yfir veginn hjá Hólaskjóli við Eldgjá.