Óttast að tala látinna eigi eftir að hækka verulega

Hátt á annað hundrað manns fórust þegar þrír öflugir jarðskjálftar riðu yfir suðvestur Pakistan í dag og þúsundir manna hafa misst heimili sín. Rauði krossinn óttast að þessar tölur eigi eftir að hækka verulega. „Jarðskjálftarnir mældust á bilinu 6,2-6,4 á Richter og ollu mestri eyðileggingu í Balukistanhéraði sem liggur við landamæri Afganistans," segir í tilkynningu frá Rauða krossinum. Íslenskur liðsmaður samtakanna er í Peshawar í Pakistan.

„Viðbragðssteymi frá Alþjóða Rauða krossinum og Rauða hálfmánanum í Pakistan voru send á vettvang þegar í morgun til að hefja neyðaraðgerðir og meta ástandið," segir einnig. „Að sögn hjálparstarfsmanna hefur fjöldi eftirskjálfta fylgt í kjölfar stóru skjálftanna þriggja og eru íbúar mjög óttaslegnir. Flestir hafast við undir berum himni en nú er orðið mjög kalt á næturnar á þessum slóðum og vetur við það að ganga í garð. Rauði hálfmáninn hefur þegar hafið dreifingu hjálpargagna á svæðinu og heilbrigðisteymi þeirra veitir særðum og sjúkum aðhlynningu og fyrstu hjálp."

Sérhæft skurðlæknateymi Alþjóða Rauða krossins sem hefur aðsetur í borginni Peshawar í norðvesturhluta Pakistan hefur einnig verið sent á staðinn. Áslaug Arnoldsdóttir hjúkrunarfræðingur og einn reyndasti sendifulltrúa Rauða kross Íslands hefur nú um tveggja mánaða skeið unnið í Peshawar fyrir Alþjóða Rauða krossinn við að veita aðstoð flóttamönnum frá átakasvæðum við landamærahéruð Afganistans. „Starfsmennirnir í þessu teymi eru allir mjög reyndir hjálparstarfsmenn fyrir Rauða krossinn og munu geta veitt særðum aðstoð á vettvangi og jafnvel framkvæma flóknar skurðaðgerðir á staðnum," segir Áslaug.

Fram kemur einnig að Áslaug hafi ekki fundið fyrir jarðskjálftunum í morgun og í dag. Hún mun halda áfram störfum sínum í Peshawar og nágrenni út nóvember.