Fundað með Rússum um lán á þriðjudag

Fulltrúar íslenskra stjórnvalda funda á þriðjudaginn með rússneskum stjórnvöldum um hugsanlegt lán Rússa til Seðlabanka Íslands. Þetta kom fram í máli Geirs H. Haarde forsætisráðherra á blaðamannafundi í Iðnó.

Geir sagði að vel kunni að vera að gengið yrði frá lánasamningi þá. Hann teldi rússneska ríkið vel aflögufært miðað við tekjur þess af sölu á olíu en það væri ekki íslenskra stjórnvalda að segja hvaðan peningarnir kæmu. Þá sagðist Geir hafa rætt við alla fjóra forsætisráðherra norrænu ríkjanna í gær og þar hefði komið fram mikill velvilji af þeirra hálfu.

Geir var spurður út í það hvernig hann mæti það að þrír af stærstu átta hluthöfum í Kaupþingi væru lífeyrissjóðir landsins og sagðist hann ekki meta það á sérstakan hátt. Enn fremur sagði forsætisráðherra stöðu stjórnar Seðlabankans óbreytta óháð yfirlýsingum síðustu daga.

Geir sagði það ljóst að ýmsir einkaaðilar á Íslandi gætu ekki staðið í skilum en að ríkissjóður myndi standa í skilum. Mönnum yrði sagt að ríkissjóður gæti ekki borgað skuldir sem einkaaðilar hefðu hlaðið upp. Ef allar þessar skuldir hefðu fallið á ríkið hefði blasað við þjóðargjaldþrot. Þjóðin yrði að átta sig á því að þetta væri ögurstund og því hefði þurft að grípa í taumana og því yrðu ýmsir að taka á sig skakkaföll.

Aðspurður hvort það hefðu verið mistök að festa gengið sagði Geir mjög líklegt að gengið myndi sveiflast á meðan óvissa í efnahagsmálum yrði uppi. Eftir að fallið hefði verið frá festingu gengisins hefði það styrkst.

Geir var spurður út í samtöl sín við ráðamenn í Svíþjóð, Danmörku, Noregi og Finnlandi og sagðist hann ekki hafa verið boðin aðstoð frá ríkjunum og að hann hefði ekki beðið um hana. Þjóðarleiðtoganir hefðu sýnt mikinn velvilja, sérstaklega Norðmenn. Ekkert væri þó fast í hendi umfram gjaldeyrisskiptasamninga sem gerðir hefðu verið fyrr á árinu. „Vissulega eigum við hauka í horni á Norðurlöndum," sagði Geir.

Reyndu að hvetja til minni skuldsetningar

Aðspurður um þau orð Davíðs Oddssonar seðlabankanstjóra að hann hefði margsinnis varað við stærð bankakerfisins sagði Geir að það hefðu margir haft áhyggjur af því að bankakerfið yrði of stórt. Ríkisstjórnin hefði allt þetta ár haft verulegar áhyggjur af þróuninni og gert það sem hægt væri að gera til þess að skuldsetning bankanna minnkaði. Menn hefðu staðið í þeirri trú að bankarnir gætu bjargað sér með endurfjármögnun en þegar fjármálamarkaðir væru botnfrosnir þá hefði þessi staða komið upp.

Björgvin G. Sigurðsson viðskiptaráðherra var spurður um það hvort núverandi bankastjórar Landsbankans og Glitnis myndu starfa þar áfram. Björgvin sagði að ekkert hefði verið rætt um hver tæki við þegar skilanefnd skilaði bönkunum til nýrrar bankastjórnar. Það hefði skipt mestu máli að bankarnir störfuðu áfram og því hafi verið lögð áhersla á að fólk mætti til sinna starfa og héldi áfram.

Geir var enn fremur spurður um stöðu fólks í Hollandi sem hefði lagt inn fé á Icesave-reikninga, um 120 þúsund manns. Sagði Geir að hann byggist við því að það sama gilti þar og í Bretlandi en viðræður við hollensk stjórnvöld væru ekki komin jafnlangt og við Breta.