Umhverfisvænir orkugjafar orsaka hærra matvælaverð

Það er ekki olían sem veldur hærra matvælaverði um allan heim. Það er heldur ekki aukin eftirspurn eftir mat, veik staða dollarans, vont veður, samdráttur í útflutningi eða hlutabréfamarkaðir - heldur er það framleiðsla á svo kölluðum umhverfisvænum orkugjöfum, það er að segja olíu sem framleidd er úr korni og grænmeti.

Þetta kemur fram í skýrslu sem starfsmaður Alþjóðabankans hefur gert og hefur verið lekið til fjölmiðla á Vesturlöndum. Hann fullyrðir að 75% af hækkun matvælaverðs - sem er að valda ólýsanlegum hörmungum í mörgum fátækustu löndum heims - stafi af því að kornvara er notuð til olíuframleiðslu - etanol og þessháttar - fremur en í matinn.

Þetta eru allt aðrar upplýsingar en haldið hefur verið á lofti að undanförnu. Bandaríkjastjórn hefur til dæmis sagt að framleiðsla þessara 'umhverfisvænu orkugjafa' sé ekki völd nema að þriggja prósenta hækkun matvælaverðs. Nú er útlit fyrir að vestrænar ríkisstjórnir neyðist til að skoða málið aftur en þær hafa flestar hverjar hvatt til framleiðslu þessarar ætluðu umhverfisvænu orku til að draga úr áhrifum gróðurhúsalofttegunda og draga úr óseðjandi fíkn eftir útlendri olíu.

Stjórnmálaleiðtogar á Vesturlöndum virðast harðákveðnir í að hafa að engu þær vísbendingar sem við höfum um að græna olían svokallaða sé að stórum hluta ábyrg fyrir verðhækkunum á matvælum, hefur breska blaðið Guardian eftir starfsmanni hjálparsamtakanna Oxfam.

Afleiðingin er sú, segir hann, að á meðan stjórnmálamenn eru önnum kafnir við að halda þrýstihópum ánægðum, hefur fólk í fátækustu löndum heims ekki efni á því að borða.

Alþjóðabankinn metur það svo að hækkandi matvælaverð hafi þrýst allt að hundrað milljónum manna undir fátæktarmörkin og komið hefur til uppþota þess vegna allt frá Bangladesh til Egyptalands.

Evrópusambandið íhugar nú að setja reglur sem skylda íbúa sambandsríkjanna til að nota að minnsta kosti 10% af grænu olíunni á bíla sína árið 2020 - en í Brussel eru menn nú að vaka upp við þann vonda draum að slík regla gæti allt eins orðið til að matarkarfan kosti enn meira en hún gerir nú þegar.