Deilt um handtöku „slátrarans frá Bosníu“

Slátrarinn frá Bosníu svonefndi, Radovan Karadzic, mun áfrýja serbneskum dómsúrskurði um framsal til stríðsglæpadómstólsins í Haag. Þetta segir verjandi Karadzic, Sveta Vujacic, sem enn fremur heldur því fram að serbnesk yfirvöld segi ekki allan sannleikann um handtöku mannsins sem meðal annars er talinn er hafa á samviskunni líf 8.000 múslima sem teknir voru af lífi í bænum Srebrenica í austurhluta Bosníu sumarið 1995.

Karadzic er sagður hafa verið handtekinn á mánudag en Vujacic fullyrðir að hann hafi í raun verið tekinn á föstudag og haldið á laun yfir helgina. Vojislav Kostunica, fyrrum forsætisráðherra Serbíu, hefur einnig gagnrýnt handtökuna og haldið því fram að stríðsglæpadómstóllinn sé ólöglegur.

Slátruðu hundruðum þúsunda

Radovan Karadzic var leiðtogi Bosníu-Serba í borgarastyrjöldinni 1992 - 1995 sem fylgdi í kjölfar aðskilnaðar Bosníu-Herzegóvínu frá þáverandi Júgóslavíu. Talið er að hermenn Karadzic hafi slátrað hundruðum þúsunda múslima og Króata þegar þjóðernishreinsanirnar svokölluðu stóðu yfir en Karadzic var þá forseti Serbneska lýðveldisins í Bosníu-Herzegóvínu. Um tíma var talið að 300.000 múslimar hefðu týnt lífi í stríðinu en nýlegar athuganir gefa til kynna að þeir hafi verið nær 100.000.

Karadzic sást síðast opinberlega árið 1996. Hann er geðlæknir að mennt og fór, að sögn serbneskra yfirvalda, huldu höfði árum saman og stundaði lækningar undir fölsku nafni. Að Karadzic handteknum er hershöfðinginn fyrrverandi, Ratko Mladic, náinn samverkamaður hans, talinn hættulegasti stríðsglæpamaður sem enn gengur laus og eru stjórnvöld í Serbíu hvött til að hafa hendur í hári hans, meðal annars af sendiherra Bandaríkjanna hjá Sameinuðu þjóðunum.

CNN greindi frá.