Bretar vilja hætta viðræðum um samstarf við Rússa

Bretar munu leggja það til að Evrópusambandið hætti viðræðum við Rússa um samstarfssamning vegna afskipta Rússa af málefnum Georgíu.

Þetta sagði talsmaður Gordons Brown, forsætisráðherra Bretlands, í morgun en leiðtogar ESB-ríkjanna funda í dag um það hvernig bregðast eigi við hernaðaðgerðum Rússa í Georgíu og viðurkenningu þeirra á sjálfstæði héraðanna Suður-Ossetíu og Abkasíu.

Talsmaður Browns sagði enn fremur að þróun mála sýndi fram á það að Evrópusambandslöndin þyrftu að hætta að stóla á Rússa í orkumálum en Rússar selja bæði olíu og gas til stórra landa innan ESB. Frakkar, Ítalir og Þjóðverjar hafa hins vegar viljað fara varlega í sakirnar varðandi refsiaðgerðir á hendur Rússum einmitt vegna þess hversu háðar þjóðirnar eru Rússum í orkumálum.