Stjórnvöld semji við alþjóðlegt almannatengslafyrirtæki

Almannatengslafélag Íslands hefur sent forsætisráðuneytinu bréf þar sem lagðar eru fram hugmyndir að almannatengslum fyrir Íslands vegna þeirra erfiðleika sem við er að etja í útlöndum.

Telur starfshópur á vegum félagsins brýnt að fyrst verði samið við alþjóðlegt almannatengslafyrirtæki sem geti tryggt að skilaboð á erlendum vettvangi og aðgerðir verði samhæfðar. Enginn vegur sé fyrir ráðuneyti eða aðgerðahópa hér heima að hafa þá staðbundnu yfirsýn sem til þurfi til að taka réttar ákvarðanir við að koma sjónarmiðum Íslendinga á framfæri erlendis.

Hópurinn telur að vel hafi verið staðið að upplýsingamiðlun hérlendis allt frá því að bankakreppan skall á en erlendis hafi dýrmæt tækifæri í upplýsingamiðlun hins vegar farið forgörðum vegna þess að ekki var leitað ráðgjafar í almannatengslum í hverju landi fyrir sig. „Svo virðist sem enn sé hik í þeim efnum af hálfu stjórnvalda og ætlunin að fjarstýra upplýsingamiðluninni héðan. Það er borin von," segir í tilkynningu Almannatengslafélagsins.

Engar skyndilausnir til

Óttast félagið að stjórnvöld ætli litla sem enga fjármuni til þess tröllaukna verkefnis að bæta orðstír Íslands erlendis heldur reiða sig að mestu leyti á eigin starfskrafta. „Með fullri virðingu fyrir getu og þekkingu starfsmanna ráðuneyta telur starfshópurinn að þar sé ekki til staðar sú þekking sem þarf í þessum efnum," segir enn fremur í tilkynningunni.

Félagið segir engar skyndilausnir til en leggur til nokkur atriði. Fara þurfi í ástandsmat og kortleggja í hvaða löndum sé mikivægast að taka á málum. Samhliða þessu þurfi að koma á fót öflugri og samhæfðri upplýsingamiðlun á þeim svæðum sem eldurinn brennur hvað heitast eins og í Bretlandi, hinum norrænu ríkjunum og Benelux-löndunum.

Þá þurfi að virkja ýmis hagsmunasamtök, fyrirtæki, félög og einstaklinga sem eigi skipuleg samskipti við erlend félög til að koma sjónarmiðum okkar á framfæri erlendis. Þá þurfi að hvetja alla Íslendinga til að taka þátt í upplýsingamiðlun til útlanda og umræðum erlendis, hvort sem er við aðra einstaklinga eða fjölmiðla. „Þeir þurfa að hafa greiðan aðgang að öllum tiltækum upplýsingum um stöðu mála og til þess er nauðsynlegt að setja upp yfirgripsmikla vefsíðu," segir Almannatengslafélag Íslands.