Íbúar Hrauns á Skaga hugsanlega fluttir brott

Lögreglan á Sauðárkróki íhugar nú að flytja íbúa bæjarins Hrauns á Skaga á brott á meðan deyfilyfi verður skotið í ísbjörninn með kvöldinu. Þetta kemur fram á fréttavefnum Skagafjörður.com.

Fjölmiðlafólki var hleypt inn á lokaða svæðið í grennd við þann stað sem ísbjörninn heldur sig á nú fyrir skömmu en vegartálmar hafa nú verið færðir lengra frá til að mynda rými fyrir þyrluna sem flytur danska sérfræðinga á staðinn. Búist er við að þeir lendi á Akureyrarflugvelli á hverri stundu.

Jóhann Rögnvaldsson, frístunda- og ferðaþjónustubóndi á Hrauni III, sagði að minnsta kosti ekki hafa verið minnst á það við íbúa þar á bæ að flytja þá á brott en auðvitað myndi hann verða við slíkri ósk kæmi hún fram. „Hann hefur nú heldur fært sig fjær mannabyggðinni núna, hann er kominn í svona hálfs kílómetra fjarlægð frá byggð," sagði Jóhann, inntur eftir staðsetningu bjarnarins.