Ekki sanngjarnt að kalla okkur óreiðumenn

Sigurjón Þ. Árnason bankastjóri Landsbankans segir ekki sanngjarnt að kalla forsvarsmenn bankanna óreiðumenn líkt og Davíð Oddsson gerði í Kastljósi gærkvöldsins. Sigurjón var gestur Kastljóss Sjónvarpsins í kvöld.

„Það sem við vorum að gera var að byggja upp stórt og öflugt bankakerfi sem skilaði miklu. Siðan lendum við í því fárviðri sem verið hefur á fjármálamörkuðum undanfarið. Öll frægustu og bestu nöfnin falla og við lendum í miðjum hvirfilbylnum með veikt bakland sem ekki hefur fylgt okkur eftir, og við náum bara ekki að standast það," sagði Sigurjón.

Hann vildi meina að það væri skilgreiningaratriði hvort bankarnir hefðu farið of geyst eða Ríkið hefði farið of hægt. Hann sagði einnig að aðilar sem menn hefðu talið fyrirfram eðlilegt að myndu hjálpa okkur hefðu ekki komið til bjargar og nefndi hann sérstaklega Bandaríkin í því sambandi.

„Því er svo komið að Seðlabankinn er farinn að vinna með Rússum, sem menn hefðu ekki átt fyrirfram von á, en staðan er svona í dag."

Þegar Sigurjón var beðinn um að rekja hvað það var sem felldi Landsbankann sagði hann að 15.september hefði verið örlagaríkur dagur þegar Lehman fjárfestingarbankinn í Bandaríkjunum fór á hausinn. „Það trúði því enginn að hann myndi vera látinn falla og þegar svo stór banki fellur myndast mikil óró á markaði og vantrú sem kom Glitni í erfiða stöðu."

Hann segir það hafa orðið til þess að Glitnir hefði leitað á náðir Seðlabankans sem reyndi að hjálpa til. Þá hafi komið í ljós hversu bakland íslensku bankanna er veikt og þá hefðu vandræði hinna bankanna margfaldast.

„Á mjög skömmum tíma byrjuðu lánalínur að lokast og lausafjárstaðan minnkaði. Á föstudaginn í síðustu viku töldum við að við ættum rétt á láni frá Evrópska Seðlabankanum."

Í lok markaða á föstudaginn kom síðan í ljós að svo væri ekki og þá breyttust allar forsendur og var unnið að því alla helgina að leysa vandann. Bankinn hafi síðan séð fram á það að geta ekki greitt lán á þriðjudeginum og því hefði verið leitað á náðir stjórnvalda um að grípa inn í og vernda íslenska sparifjáreigendur og bjarga því sem bjargað var.

Sigurjón sagði þó mikilvægt að átta sig á því að Ísland væri í sterkri stöðu þó bankakerfið væri ekki eins sterkt og áður. „Við erum með orkuauðlindir sem við þurfum að nýta og koma í verð. Mér finnst hafa verið tregða á Íslandi við að nýta þessar auðlindir, en nú er tækifærið."