Lýsing í Einholt annað kvöld

Vonast er til þess að lýsing verði komin við Einholt í Reykjavík annað kvöld þar sem nú er unnið að bráðabirgðalausn. Þetta kemur fram í tilkynningu borgaryfirvalda.

Stöð 2 vakti athygli á því í kvöldfréttum í gær að íbúar við götuna hefðu neyðst til að setja upp eigin götulýsingar þar sem Orkuveitan hefði ekki orðið við beiðnum um að kveikja á ljósastaurum í fimm mánuði.

Í tilkynningu borgaryfirvalda vegna þessa segir að fram framkvæmdir á vegum Byggingafélags námsmanna við Einholt hafi tafist þannig að götulýsing hafi ekki verið virk um skeið.

„Götulýsing er í eigu Reykjavíkurborgar og rekin af Orkuveitu Reykjavíkur. OR barst beiðni frá Reykjavíkurborg um uppsetningu bráðabirgðalýsingar fyrir helgina. Vinnuflokkar Orkuveitu Reykjavíkur hófu uppsetningu hennar í morgun og gangi verkið að óskum verður komin lýsing við götuna annað kvöld. Reykjavíkurborg og Orkuveita Reykjavíkur munu fara sameiginlega yfir ástæður þess að götulýsingar naut ekki við svo lengi með það fyrir augum að slíkt endurtaki sig ekki," segir í tilkynningu borgarinnar.