Viðtalið við Björgólf Thor í Kompási

Í fréttaskýringaþættinum Kompási var í kvöld rætt við Björgólf Thor Björgólfsson. Þáttinn er hægt að nálgast hér.

Hvöss spjót beinast nú að Björgólfi Thor Björgólfssyni, ríkasta manni Íslands. Hann er sakaður um að bera að hluta til ábyrgð á hruni íslenska efnahagskerfisins. Hann svarar hér gagnrýninni en er jafnframt ómyrkur í máli gagnvart ríkisvaldinu og Seðlabanka. Hann upplýsir hvað gerðist bak við tjöldin þá örlagaríka daga þegar hagkerfið rambaði á barmi hruns og sakar stjórnvöld um að hafa tekið kolrangar ákvarðanir, þrátt fyrir alvarleg viðvörunarorð. Það voru skelfileg mistök að þjóðnýta Glitni, segir hann og upplýsir einnig hvernig stjórnvöld virtu ekki viðlits tilboð um að losna undan Icesave ábyrgðum sama dag og neyðarlög voru sett í landinu. Þetta telur Björgólfur Thor að skýri hin harkalegu viðbrögð Breta og alvarlega milliríkjadeilu landanna.

Landsbankinn fór á breskan hryðjuverkalista með Al-Qaida, Súdan, Norður-Kóreu og Talibönum. Bretar heimta að íslenska þjóðin ábyrgist hundruð milljarða króna vegna Icesave innlánsreikninga Landsbankans. Gífurleg reiði hefur blossað upp meðal þjóðarinnar í garð Björgólfsfeðga. Það er krafist þjóðnýtingar og eignaupptöku, í það minnsta samfélagslegrar og siðferðislegrar ábyrgðar af þeirra hálfu. Kristinn Hrafnsson tók viðtal við Björgólf Thor í London á föstudag.

Björgólfur Thor upplýsir hér í fyrsta sinn að degi áður en hér voru sett neyðarlög hafi Bretar kúvent og boðist til að taka Icesave undir breska ábyrgð á fimm dögum gegn því að Seðlabankinn veitti tryggingu. Þessu hafi Seðlabankinn hafnað og í staðinn hrundi restinn af íslensku bankakerfi og þjóðin lenti í harðvítugri milliríkjadeilu. Helgina áður fullyrðir Björgólfur að ríkisvaldið hafi ekki einu sinni svarað tilboðum sem hefðu hindrað þjóðnýtingu Glitnis og afstýrt örlagaríku hruni bankakerfisins.