Guðni: Ekki hægt að greiða sjómönnum bætur

Guðni Ágústsson, formaður Framsóknarflokksins, gagnrýnir ríkisstjórnina fyrir seinagang í viðbrögðum við áliti mannréttindanefndar SÞ varðandi kvótakerfið. Hann segir að ófremdarástand hefði skapast ef sjómönnum yrðu greiddar bætur.

„Það hefði skapast ófremdarástand ef stjórnvöld hefðu orðalaust opnað veskið og greitt þessum tveimur mönnum stórkostlegar skaðabætur þar sem að sami réttur hefur sjálfsagt verið brotinn á mörgum fleirum," segir Guðni og bætir við:,,álitið snerist um mannréttindi en ekki um peninga."

Guðni skorar á ríkisstjórnina að skipa nefnd til að fara yfir málið og hann telur afar brýnt að hún verði skipuð breiðum hópi hagsmunaaðila og fulltrúa allra flokka á Alþingi. Guðni segir að nú liggi fyrir að kerfinu verði að breyta.

,,Það er mikilvægt að stjórnvöld hefji vinnu við að endurskoða fiskveiðistjórnunarkerfið út frá stöðu byggðanna, breyttum tímum, reynslunni á núverandi kerfi og niðurstöðu nefndarinnar." Annars segir Guðni að ríkisstjórnin skapi deilur og átök. ,,Sjávarútvegurinn þarf á því að halda að gengið verði hreint til verks."

Guðni segist greina mikinn ágreining á milli stjórnarflokkanna í svarbréfinu. Hann segist hafa gagnrýnt sjávarúvegsráðherra og ríkisstjórnina fyrir að hafa ,,ekkert gert þessa 180 daga sem þau höfðu til að svara og þau geta ekki haft framhaldið eins."