Fyrrum sjónvarpsstjarna gerir góðverk

„Ég var að taka til í skápnum hjá 13 ára syni mínum þar sem ég rakst á tvennar svartar jólabuxur sem hann var augljóslega vaxinn uppúr ásamt hvítri skyrtu og jólaskóm," svarar Sesselja Thorberg sem margir þekkja úr sjónvarpsþáttunum Innlit/útlit aðspurð hvernig hún fékk hugmyndina að Jóla-fata-skipti-markaðnum sem starfræktur verður í Neskirkju fram að jólum.

„Þar sem það sást ekki á þessu gat ég ekki hugsað mér að fleygja þessu og því miður á ég ekki litla frændur sem hefðu getað notið góðs af."

„Mér varð hugsað til allra þeirra sem hafa misst vinnuna undafarið og horfa fram á þrengri kost en þau eru vön þessi jól," segir Sesselja.

„Og hvar gæti þetta annars góða fólk sparað til? Nú af hverju ekki með þessu móti? Sumir eiga jafnvel 2-3 börn sem öllum vantar jólaföt að einhverju leyti," segir Sesselja.

„Á þennan hátt væri hægt að fá fólk til þess að fá nýta „gömlu" jólafötin og fá ný í staðinn. Nú svo eru auðvitað margir sem kannski þurfa ekki að fá neitt á móti nema ánægjuna af því að gefa."

„Ég setti mig því í samband við Sr. Sigurð Árna prest í Neskirkju. Hann er nú svo drífandi og hann var heldur ekki lengi að setja saman sjálfboðaliðahóp í kringum þetta. Við funduðum og settum saman prógram í kirkjunni."

Út á hvað gengur skiptimarkaðurinn? „Jóla-fata-skipti-markaðurinn gengur útá að allir foreldrar séu hvattir til þess að koma með jólafötin af börnum sínum sem þau eru vaxin uppúr og fá þeim skipt fyrir föt sem passa á þau þetta árið," segir Sesselja.

„Allir geta komið með jólaföt alla virka daga niðrí Neskirkju á skrifstofutíma eða frá klukkan 10-11 alla sunnudaga í aðventunni. Við mælum þó með að fötin fái einn hring í þvottavélinni áður en komið er með þau svo þau fái nú alvöru jólaglans á sig."

„Við ætlum að hafa þetta mjög huggulegt og reyna að setja þetta allt snyrtilega upp eins og um raunverulega „búð" væri að ræða. Jólatónlist í eyrum og kanil og mandarínulykt. Mjóg kósí.

„Er nokkuð til betri leið til þess að styðja við sparnað hjá barnafjölskyldum og í leiðinni stuðla við að endurvinnslu?," spyr Sesselja að lokum.

Markaðurinn, sem verður á 1. hæð í nýja safnaðarheimili Neskirkju, er opinn á milli 12-14 alla aðventusunnudagana. Sjá nánar hér.