Koma á fót upplýsingamiðstöð fyrir almenning vegna kreppunnar

Íslensk stjórnvöld hafa komið á fót upplýsingamiðstöð fyrir almenning, fjölmiðla og fyrirtæki vegna þeirra erfiðleika sem nú ríkja í íslensku fjármálalífi.

Fram kemur í tilkynningu utanríkisráðuneytisins að tekið sé á móti fyrirspurnum í síma og með tölvupósti sem beint er til íslenskra stjórnvalda og varða þær aðstæður sem nú ríkja. Miðstöðin tekur á móti fyrirspurnum og ýmist svarar þeim eða vísar þeim til viðeigandi stofnana.

Fjölmiðlamiðstöð, sem komið var á fót á dögunum í Miðbæjarskólanum, verður áfram starfandi og verður fyrirspurnum fjölmiðla beint þangað. Þjónustu- og upplýsinganet, sem rekið hefur verið af félags- og tryggingamálaráðuneytinu verður rekið áfram, samtengt upplýsingamiðstöðinni, á vefslóðinni: felagsmalaraduneyti.is/upplysingar.

Hægt er að ná sambandi við upplýsingamiðstöðina í síma 545 8950 eða í grænu símanúmeri 800 1190 milli 8 og 22 alla virka daga. Einnig er hægt að beina fyrirspurnum til miðstöðvarinnar í tölvupósti á netfangið: midstod@mfa.is.