Segir gróðahyggju vera sökudólginn

Árni Þór Sigurðsson, þingmaður VG, segir að samfélagið hafi orðið fyrir áfalli og standi á krossgötum. Sökudólgurinn er að hans mati ekki einhver einn eða nokkrir einstaklingar heldur hugmyndafræði og pólitísk stefna.

,,Græðgin og drambið, gróðahyggjan hefur verið hafin upp á stall, ímyndin um að velmegun og vöxtur gæti varað að eilífu, dansinn í kringum gullkálfinn myndi engan enda taka. Og það eru ekki bara þeir sem þar hafa verið í fararbroddi sem gjalda nú fyrir skipbrot þessara gilda. Nei, það er þjóðin öll," segir Árni í pistli á heimasíðu sinni.

Reynslan er harður húsbóndi, að mati Árna sem telur að reynslan sé nú dýrmætari en oft áður.

,,Við skulum hafa hana í farteskinu þegar við hefjum uppbyggingarstarf, við skulum öll taka höndum saman um að kasta nýfrjálshyggjunni á ,,öskuhauga sögunnar" og hefja raunverulega félagshyggju í öndvegi. Þannig mun okkur best farnast," segir Árni.

Skrif Árna er hægt að lesa hér.