Skuldir heimilanna nærri 1.800 milljarðar um mitt ár

Skuldir íslenskra heimila við lánastofnanir vou 1.760 milljarðar króna um mitt ár samkvæmt tölum Seðlabankans. Höfðu þær aukist um rúma 200 milljarða á fyrri helmingi ársins eða um 13,5 prósent. Vitnað er til þessara talna í nýju vefriti fjármálaráðuneytisins.

Með lánakerfinu er átt við banka, Íbúðalánasjóð, lífeyrissjóði, LÍN og tryggingarfélög. Þar kemur fram að skuldir heimilanna hafi verið um 1550 milljarðar um síðustu áramót og námu ráðstöfunartekjur heimilanna á sama tíma rétt rúmum 700 milljörðum. Því var skuldin rúmlega tvöfaldar ráðstöfunartekjur ársins.

„Skuldir við Íbúðalánasjóð eru vegna íbúðakaupa og mestur hluti lána við lífeyrissjóði. Af skuldum við bankana teljast 60% vera vegna íbúðakaupa meðan lán LÍN og skuldir við tryggingarfélög eru vegna annars," segir í vefritinu.

Þar kemur enn fremur fram skuldir við bankana hafi verið um þúsund milljarðar á miðju ári, þar af 626 milljarðar verðtryggðar skuldir meðan 210 milljarðar voru gengistryggð lán. Yfirdráttarlán heimilanna námu 81 milljarði, óverðtryggð lán 28 milljörðum og eignarleigusamningar 21 milljarði.

Fjórðungur skuldar ekki neitt í íbúðum sínum

Enn fremur kemur í ljós að skuldir vegna íbúðakaupa hafi verið 840 milljarðar um síðustu áramót á meðan verðmæti framtalinna fasteigna taldist nær 2.400 milljarðar. Tæplega 97 þúsund fjölskyldur telja fram fasteignir og af þeim telur fjórðungur ekki fram neinar skuldir.

„Hins vegar voru skuldir vegna íbúðakaupa yfir 80% af verðmæti hjá um fjórðungi þeirra sem þá eru eftir, alls 17.500 fjölskyldum og samtals töldust skuldir þess hóps vegna íbúðakaupa um 300 ma.kr. um síðustu áramót en heildarskuldir 357 milljarðar.

Eins og eðlilegt hlýtur að teljast er aðallega um að ræða yngra fólk, en meðalaldurinn í þessum hópi er tæplega 40 ár, sem er um tíu árum undir meðalaldri allra með íbúðalán. Þótt þessi hópur sé líklega viðkvæmari fyrir þeim áföllum sem nú dynja yfir, er greiðslugeta þeirra af lánum enn fyrir hendi. Þá er atvinnuleysi enn hlutfallslega lítið þótt það sé tekið að aukast," segir fjármálaráðuneytið.