Bogi reisir friðarkúlu

Bogi Jónsson á Hliði á Álftanesi stendur illa fjárhagslega, eins og hér kom nýlega fram. Hann lætur það þó ekki slá sig út af laginu og hefur búið til friðarkúlu sem mun standa á landareign hans.

„Fljótlega eftir að ég hætti að djúsa dreymdi mig draum sem kveikti þessa hugmynd,“ segir Bogi. „Mig dreymdi að ég væri að túlka á minn eigin hátt það að við erum öll íbúar í sömu íbúðinni, jörðinni okkar, þótt við innréttum herbergin okkar misjafnlega eftir smekk hvers og eins. Hugmyndin þróaðist í rólegheitum og svo má segja að friðarsúla Yókóar hafi endanlega sannfært mig um að ég ætti að láta drauminn rætast.“

Bogi ætlar að vígja kúluna 22. desember og vonar að fulltrúar sem flestra trúarhópa verði viðstaddir vígsluna. „Friðarkúlan er til afnota fyrir alla íbúa allra herbergja í íbúðinni okkar, jörðinni,“ segir Bogi. „Það eru raufar í henni sem ætlaðar eru til að fólk leggi inn óskir sínar um frið á jörð og betra líf. Svo biðjum við til almættisins, hvaða nafni sem við nefnum það, að hjálpa okkur við að láta óskina rætast ef hún er okkur til farsældar.“

Kúlan verður staðsett rétt við afleggjarann að Hliði. „Það þarf enginn að vera feiminn við að koma og létta á áhyggjum sínum í kúluna. Á þessum skemmtilegu tímum – eða hitt þó heldur – er margt vitlausara en að gera sér ferð í kyrrðina út á Álftanes. Ég mun setja öll þau trúartákn á kúluna sem ég get grafið upp og vona að hún megi verða sandkorn á vogarskál friðar og sátta í heiminum. Til þess að friður og sátt ríki í heiminum þarft þú einungis að fá eina manneskju til að verða til friðs: þig!“ - drg