Ræktuðu ekki sambandið við Björn Inga

Sjálfstæðismenn ræktuðu illa sambandið við Björn Inga Hrafnsson, þáverandi oddvita Framsóknarflokksins, sem varð til þess að upp úr slitnaði í samstarfi flokkanna í október á síðasta ári. Þetta segir Gísli í pistli á heimasíðu sinni.

,,Ég er spurður hvernig við getum treyst Framsóknarmönnum aftur eftir svikin síðast. Ég svara því til að síðast ræktuðum við illa sambandið á milli flokkanna þegar mest reið á," segir Gísli og bætir við að framsóknarmenn hafi haldið að Sjálfstæðisflokkurinn væri að mynda annan meirihluta bak við þá.

Gísli segir að gamlir framsóknarsleðar hafi fullyrt að svo væri við við Björn Inga. ,,Það var hinsvegar fjarri sanni og það var ekki fyrr en ég fékk símhringingu frá Vilhjálmi, þar sem ég sat og át rækjubrauð í Höfða ásamt Óskari Bergssyni, að það rann upp fyrir mér að meirihlutinn væri sprunginn. Fyrst þá hófum við máttlausar tilraunir til að brjótast inn í samdrátt hins laglausa Tjarnarkvartets."

Gísli viðurkennir að fráfarandi meirihluti hafi ekki reynst nægjanlega sterkur. ,,Við vorum allt of lengi að taka ákvarðanir og þegar sum okkar héldu að búið væri að taka þær, reyndust þær skyndilega komnar upp í loft aftur. Það er erfitt að vinna við þannig aðstæður."

Allt frá því að REI málið hófst fyrir 11 mánuðum hefur hvílt myrkur yfir því sem farið hefur fram í ráðhúsi Reykjavíkur, að mati Gísla. ,,Flokkar sem lítið áttu sameiginlegt reyndu að vinna saman í 100 daga, án þess að koma sér saman um það að hverju ætti að vinna. Tjarnarkvartettinn söng aldrei eitt einasta lag, því sönghópurinn kom sér ekki saman um lagaval."

Pistil Gísla Marteins er hægt að lesa hér.