Óskar staðfestir að Marsibil styðji ekki nýja meirihlutann

Marsibil Sæmundardóttir, sem er varaborgarfulltrúi fyrir Óskar Bergsson í Framsóknarflokknum, mun ekki starfa með nýmynduðum meirihluta Sjálfstæðisflokks og Framsóknarflokks í Reykjavík. Þetta kom í ljós eftir samtal Óskars og Marsibil í morgun.

Óskar Bergsson, oddviti Framsóknarflokks, segir í samtali við Vísi í dag að þetta fipaði flokkinn í upphafi meirihlutasamstarfs. "Það er samt betra að þetta komi upp núna því það er nauðsynlegt að þeir sem eru í þessu meirihlutasamstarfi séu í þessu af heilum hug," segir Óskar.

Í Fréttablaðinu í morgun var haft eftir Marsibil að hún styddi ekki þennan meirihluta og samkvæmt Óskari hefur sú afstaða hennar ekki breyst.

Aðspurður hvort upp sé komin sama staða og hjá Ólafi F. Magnússyni og Margréti Sverrisdóttur hjá F-lista þegar síðasti meirihluti var myndaður sagði Óskar svo ekki vera. "Þau töluðu ekki saman en á milli okkar Marsibil ríkir trúnaður og vinsemd. Hún verður hins vegar að svara því hvernig hún ætlar að vinna úr þessu," segir Óskar.

Aðspurðru hvort hann hefði getað unnið hlutina öðruvísi svaraði Óskar því til að hraðinn hefði verið mikill, sennilega of mikill þegar horft væri til baka.