Vonar að Marsibil fylgi Óskari þegar upp er staðið

Guðni Ágústsson, formaður Framsóknarflokksins segir að Óskar Bergsson hafi fylgt sannfæringu sinni þegar hann ákvað mynda meirihluta með sjálfstæðismönnum í borgarstjórn í gær. Hann segir að afstaða Marsibil Sæmundardóttur sé harðari en hann átti von á.

„Ég held að staðan í Reykjavík hafi verið að þróast í mjög slæman farveg hvað varðar fyrri meirihlutasamstarf. Sjálfstæðismenn kusu sjálfir að rjúfa það samstarf áður en lengra yrði haldið og þá var komin upp pattstaða í borginni því á Ólaf F. Magnússon er ekki hægt að treysta í meirihlutasamstarfi," segir Guðni. Hann segir ljóst að um blekkingar hafi verið að ræða í gær þegar sagt var að Ólafur hefði verið tilbúinn til að stíga til hliðar til þess að greiða götuna fyrir nýjum Tjarnarkvartett. „Óskar Bergsson fylgdi sannfæringu sinni í þessu máli og við þessa breytingu kemst á festa og öryggi sem er borginni mikilvægt."

Aðspurður um aðkomu sína að málinu segir Guðni að hún verið lítil sem engin. „Óskar ræddi við mig á þriðjudag eða miðvikudag og greindi mér frá stöðu mála eins og hún var þá. Geir H. Haarde hafði einnig samband við mig þar sem hann fór yfir málin með mér eins og komið hefur fram í fjölmiðlum. En Óskar hefur með sínu fólki ákveðið að fara þessa leið og hann tjáði mér að hann væri sannfærður um að enginn annar kostur væri í spilunum."

Marsibil Sæmundardóttir, varamaður Óskars í borgarstjórn segir í Fréttablaðinu í dag að hún ætli sér ekki að styðja nýja meirihlutann í borginni. „Afstaða hennar er harðari en ég átti von á," segir Guðni og segist hafa vitað um hennar tilfinngar í málinu. „Ég taldi þó að Marsibil myndi fylgja Óskari og vona að hún geri það þegar upp er staðið og hún sér að sannfæring Óskars er byggð á samtölum sínum við sitt fólk og þá undarlegu stöðu sem uppi var í borginni," segir Guðni að lokum.