Hátt í 60 látnir eftir mannskæða sjálfsvígsárás í Pakistan

Að minnsta kosti 57 manns eru látnir eftir tvær sjálfsmorðsárásir við vopnaverksmiðju í pakistönsku borginni Wah. Árásin átti sér stað er verkamenn voru á leið í og úr vinnu eftir vaktaskipti. Talið er að tala látinna eigi enn eftir að hækka töluvert.

Að sögn viðmælanda BBC er borgin vanalega undir mjög miklu eftirliti en Wah er mikil iðnaðarborg sem sérhæfir sig nær eingöngu í vopnaframleiðslu. Borgin er staðsett eingöngu þrjátíu kílómetra norð-vestur af Islamabad, höfuðborg Pakistans.

Sjúkraliðar og hermenn aðhafast þessa stundina á svæðinu en vitni lýsa slysstað eins og vígvelli þar sem lík liggja á víð og dreif.

Þetta er önnur hryðjuverkaárásin í Pakistan frá því að Pervez Musharraf sagði af sér sem forseti landsins en á þriðjudag féllu yfir þrjátíu manns í sjálfsmorðsárás á spítala í bænum Dera Ismail Kahn.

Talibanir hafa lýst sig ábyrga yfir tilræðinu og segja það gert til að hefna fyrir aðgerðir pakistanska hersins í Swat og Bajaur.