Hefur áhyggjur af vaxandi atvinnuleysi

„Allir sem eitthvað huga að núverandi aðstæðum kvíða morgundeginum," sagði Guðjón Arnar Kristjánsson, formaður Frjálslynda flokksins, í umræðum um stefnuræðu forsætisráðherra. Hann sagði að Sjálfstæðisflokkur og Samfylking væru að stefna þjóðarskútunni í skipsbrot.

Guðjón Arnar sagði að alþingismenn bæru mikla ábyrgð í að vinna á vandanum sem steðjar að. Mikilvægt væri að sína samstöðu í að finna lausn á vandanum. Hann spurði jafnframt hvers vegna forsætisráðherra hefði ekki séð efnahagsþrengingarnar fyrir í stefnuræðu sinni sem hann hélt fyrir ári síðan.

Guðjón Arnar gerði vaxandi atvinnuleysi að umtalsefni sínu. Það er ekki ástæða fyrir þjóðina að gleðjast - enda er henni þórðargleði ekki eðlislæg," sagði Guðjón Arnar. Hann spurði hvort ekki væri komið að þvi að ríkissjóður tæki stórt erlent lán til að tryggja gjaldeyrisforðann.