Banki í gjörgæslu Fjármálaeftirlitsins

Skilanefnd hefur að beiðni Fjármálaeftirlitsins (FME) tekið yfir vald hluthafafundar Landsbanka Íslands og vikið stjórn bankans frá störfum. Tilkynnt var um þetta fyrir opnun markaða í gær.

Hluthafar tapa öllum sínum hlut í bankanum, þar á meðal feðgarnir Björgólfur Guðmundsson og Björg­ólfur Thor Björgólfsson. Í kjölfarið var farið fram á greiðslustöðvun fyrir eignarhaldsfélag þeirra, Samson, sem tapar tugum milljarða króna.

Bankastjórar Lands­bankans, Halldór J. Kristjánsson og Sigur­jón Þ. Árnason, starfa áfram að beiðni skilanefndarinnar.

Gjörningurinn kemur í kjölfar nýrra laga sem samþykkt voru í fyrrinótt og rýmkuðu mjög valdheimildir Fjármálaeftirlitsins. Landsbankinn hefur orðið fyrir stórfelldum úttektum af IceSave-innlánsreikningum í Bretlandi. Líkur eru taldar á að ábyrgðir vegna þeirra reikninga kunni að falla, að minnsta kosti að hluta, á íslenska ríkið sem ábyrgist innistæður íslenskra banka. Er þar munur á innlánsreikningum eins og Edge, sem er undir hatti erlends dótturfélags Kaupþings.

Vandkvæði Landsbankans og raunar Glitnis líka hafa verið rakin til skorts á baklandi bankanna í nægilega öflugum gjaldeyrisvarasjóði.

„Hefðu þeir komið okkur til hjálpar er ekki víst að við værum í þessari stöðu,“ segir Árni M. Mathiesen fjármálaráðherra um Bandaríkjamenn. Hann segir að sóst hafi verið eftir aðstoð vestur um haf mánuðum saman, en án árangurs. Hann ræddi við aðstoðarfjármálaráðherra Bandaríkjanna í fyrrakvöld. Í gærmorgun var svo tilkynnt um að líkast til væri von á stóru láni frá Rússum.

Geir H. Haarde forsætisráðherra vísaði einnig til þess að leitað hafi verið til „vinaþjóðar“ án þess að stuðningur fengist. „Þegar það gerðist urðum við að leita nýrra vina,“ sagði hann í gær.

Geir upplýsti að ríkisstjórnin hefði leitað eftir lána­fyrirgreiðslu hjá Rússum í sumar og hafi verið staðfest í gærmorgun fyrirgreiðsla upp á fjóra milljarða evra, jafnvirði 620 milljarða króna, á skráðu gengi Seðlabankans. Samkvæmt Seðlabankanum er búist við að lánið yrði til allt að fjögurra ára, á vöxtum 0,30 til 0,55 prósentustigum yfir Libor-millibankavöxtum. Lánið mun þó ekki að fullu frágengið og hefjast samkvæmt tilkynningu Seðlabankans viðræður við Rússa um fjármálaleg atriði innan fárra daga. Sérfræðingar fara héðan til viðræðnanna í Moskvuborg.

- óká, ikh, jab / sjá Markaðinn