Össur vill slá skjaldborg um sparisjóðina

Össur Skarphéðinsson, iðnaðarráðherra, vill slá skjaldborg um þá sparisjóði sem eru vel reknir og hafa sterkar vaxtalínur inn í framtíðina. Þetta kom fram í þættinum Bylgjunni í bítið fyrr í morgun.

Bankastofnanirnar Glitnir, Landsbankinn og nú síðast Kaupþing eru komnar í hendur ríkisins. Aðspurður hvað erði um aðrar bankastofanir eins og sparisjóðina og Byr sagði Össur að það verði að koma í ljós.

,,Varðandi Byr þá er það sterkur og öflugur banki með mikið eigið fé, það eru þær upplýsingar sem ég hef. Við vitum auðvitað að Spron hefur verið í ákveðnum ólgusjó."

Þá sagði Össur; ,,Ég get upplýst ykkur um það að þótt klukkan sé ekki orðin níu að morgni þá hef ég þegar átt fund á þessum morgni með forsvarsmanni sparisjóðanna í landinu til að ræða ákveðnar leiðir. Bæði þá möguleika að þeir taki að sér ákveðna greiðslumiðlun við útlönd og sömuleiðis ákveðna aðgerðir fyrir utan þær sem komu fram í þessum lögum sem við samþykktum sem miða að því að styrkja þá.“

Viðtalið í heild sinni er hægt að nálgast hér.