Segir Svandísi Svavarsdóttur vera að skjóta sig í fótinn

Marta Guðjónsdóttir, fulltrúi Sjálfstæðisflokksins í menntaráði borgarinnar, segir að Svandís Svavarsdóttir, borgarfulltrúi Vinstri - grænna, sé að skjóta sig í fótinn með því að segja að ekki hafi áður komið fyrir að meirihluti í borgarstjórn hafi verið í minnihluta í ráðum borgarinnar.

„Það er auðvelt að sjá með því að fletta fundargerðum til dæmis í samgönguráði. Það kom oft fyrir að þáverandi meirihluti R-listans var í minnihluta á fundum þess ráðs," segir Marta Guðjónsdóttir. „Og til að herma orð Svandísar upp á hana sjálfa hefur R-listinn því oft verið óstarfhæfur með þessum hætti."

Marta segir hvað fundinn í menntaráði varðar hafi meirihlutinn ekki verið í minnihluta heldur hafi verið jöfn staða þar sem fulltrúi Framsóknar er áheyrnarfulltrúi og hefur ekki atkvæðarétt.

„Við töldum enga ástæðu til að kalla inn varamann fyrir aðalfulltrúa hjá okkur sem forfallaðist skömmu fyrir fundinn," segir Marta. „Það var vegna þess að um stuttan fund var að ræða og þverpólitísk samstaða um umræðuefnið sem var skólastarf í Hvassaleitisskóla."