Skilyrði að bankar færi líka eignir heim

"Að þessum björgunarleiðangri verða allir að koma; stjórnvöld, Seðlabankinn, viðskiptabankarnir, fjárfestingarfélög og aðilar vinnumarkaðarins. Öðruvísi er þetta ekki framkvæmanlegt," sagði Arnar Sigurmundsson, formaður stjórnar Landssamtaka lífeyrissjóða, eftir fund með fjórum ráðherrum í Ráðherrabústaðnum við Tjarnargötu á sjöunda tímanum í gærkvöld. Á þeim fundi svöruðu lífeyrissjóðirnir erindi stjórnvalda um að þeir selji hluta eigna sinna í útlöndum og flytji heim. Við það styrkist gjaldeyrisforði þjóðarbúsins og gengi krónunnar þar með.

Af 1.800 milljarða heildareignum lífeyrissjóðanna eru 500 milljarðar ávaxtaðir í útlöndum. Hluti þeirrar fjárhæðar er bundinn til lengri tíma en annað ekki. "Það er ekki verið að tala um nálægt því allar þessar eignir en stóran hluta," segir Arnar sem vill að öðru leyti ekki upplýsa um hve háar fjárhæðir er ræða.

Ekki er ljóst hve langan tíma tekur að losa um eignir í útlöndum, né hvort, og þá hvaða, lagabreytinga er þörf.

Landssamtök lífeyrissjóða hófu þegar á þriðjudag athugun á möguleika þess að færa hluta eigna sinna heim. Eftir að formlegt erindi stjórnvalda þar um hafði komið fram var í gær haldinn fundur fulltrúa nánast allra lífeyrissjóða landsins, 30 að tölu, og afstaða mótuð.

"Það er grundvallaratriði að fjármálastofnanir og bankar flytji hluta eigna sinna heim að því marki sem mögulegt er. Annað er fráleitt," sagði Ögmundur Jónasson, formaður BSRB og varaformaður stærsta lífeyrissjóðsins; Lífeyrissjóðs starfsmanna ríkisins. Ögmundur segir niðurstöðu verða að fást í dag og kallar eftir eignasölu. "Mín skoðun er að bönkum og fjármálastofnunum beri að huga að eignasölu til að hjálpa til við að leysa okkur niður úr þeirri snöru sem þjóðin hangir í núna."

Ögmundur segir það kröfu lífeyrissjóðanna að það fjármagn sem þeir færi til landsins, ef til þess kemur, muni gagnast ríkissjóði beint. "Við erum ekki að setja lífeyrissjóðspeninga á almennt spil. Það verður að vera rækilega skilgreint í hvað þeir peningar yrðu notaðir þannig að þeir verði fullkomlega tryggðir."