Steinunn Rögnvaldsdóttir nýr formaður UVG

Steinunn Rögnvaldsdóttir var kjörin formaður nýrrar stjórnar Ungra Vinstri grænna í stað Auðar Lilju Erlingsdóttur á landsfundi sambandsins sem fór fram á Akureyri um helgina. Auður hefur gegnt embættinu undanfarin tvö starfsár en gaf ekki kost á sér áfram.

Fundinn sátu 40 ungliðar frá öllum landshornum. Í tilkynningu frá UVG segir að fundurinn hafi farið fram í skugga þeirrar óvissu og umbrota sem ríki í efnahagsmálum þjóðarinnar og hafi umræður á fundinum einkennst mjög af þeirri staðreynd, sem og ályktanir fundarins. Meðal annars hafi verið ályktað um hrun heimskapítalismans og stöðuna í efnahagsmálum. Einnig hafi fundurinn samþykkt að leggja fram sparnaðaráætlun sem feli í sér fyrir nokkurra tugmiljarða sparnað í óþörfum verkefnum ríkissjóðs.