Flytja til Frakklands

Brad Pitt, Angelina Jolie og börnin þeirra sex hafa ákveðið að setjast að í Frakklandi, Þetta staðfestir Pitt í samtali við tímaritið Hello. Hann viðurkennir að þessi þeytingur sem kvikmyndastjörnur þurfi sífellt að vera á hafi ekki farið vel í börnin og að nú þurfi þau einhvern fastan samastað. „Þau hafa farið heimshornanna á milli og verið á stöðugum flækingi undanfarið ár. Þetta gengur ekki lengur og við viljum búa þeim alvöru heimili.“

Pitt segist vera mikill aðdáandi Frakklands og kunni vel við sig meðal Fransmanna. „Það er virkilega gott að búa hérna, krakkarnir okkar geta hlaupið frjálsir um og okkur semur vel við þorpsbúa,“ segir Pitt en hvergi í fréttinni kemur fram hvar hús þeirra hjóna er.

Brad Pitt er um þessar mundir að leika í nýjustu kvikmynd Quentin Tarantino, Inglorious Bastards, en tökur á henni fara fram í Þýskalandi. Hann á því auðveldara með að skreppa í helgarferðir heim til Frakklands en kannski að fljúga alla leið til L.A.