Sunny von Bulow látin

Marta, eða Sunny von Bulow sem verið hefur í dauðadái í 28 ár lést á hjúkrunarheimili í New York í Bandaríkjunum í dag, 76 ára gömul. Tvívegis var réttað yfir eiginmanni hennar á áttunda og níunda áratugnum og hann sakaður um að hafa ítrekað reynt að myrða hana og fræg kvikmynd var gerð um málið.

Réttarhöldin yfir Claus von Bulow vöktu heimsathygli á sínum tíma. Hann er breskur aðalsmaður af dönskum og þýskum ættum sem giftist Mörtu, eða Sunny, Crawford sem var dóttir milljónamærinigsins George Crawford. Hann var sakaður um að hafa sprautað konu sína með inúslíni árið 1979 þannig að hún fór í dá, sem hún þó vaknaði aftur upp frá og hafa svo endurtekið leikinn hinn 21. desember 1980, með þeim afleiðingum að hin 49 ára gamla Sunny féll í dauðadá sem hún vaknaði aldrei aftur upp frá.

Saksóknari og börn Sunny af fyrra hjónabandi töldu að Claus hafi reynt að myrða konu sína til að komast yfir gífurleg auðæfi hennar og sjóð sem hún hafði stofnað í hans nafni og hann átti að hafa aðgang að eftir hennar dag. Árið 1982 var hann fundinn sekur um að hafa í tvígang reynt að myrða eiginkonu sína, en sem áfríjunardómstóll hafnaði síðan og svo var hann sýknaður í öðrum réttarhöldum árið 1985. Hann flutti tveimur árum síðar til Bretlands og samþykkti að falla frá öllum kröfum í dánarbú eiginkonunnar og sjóðinn sem honum var ætlaður og samþykkti einnig skilnað við hana. Hann býr nú í Bretlandi.

Hjúkrun eiginkonunnar kefur kostað milljónir dollara í þau 28 ár sem hún hefur verið í dauðadái. Jeremy Irons og Glenn Close léku þau hjónin í kvikmyndinni Reversal of Fortune sem gerð var árið 1990 og vakti mikla athygli.