Hið stóra bókhald guðdómsins

„Öll erum við veitendur og þiggjendur í hinu stóra bókhaldi guðdómsins. Nú er tími umhyggju og samstöðu. Síðar kemur að tíma uppgjörsins þegar reikningar verða greiddir og sagan skrifuð," sagði biskup Íslands, herra Karl Sigurbjörnsson, í messu í Seltjarnarneskirkju klukkan 11 í morgun. Lagði biskup út af kraftaverkasögunni um það þegar Jesú læknaði son herforingjans.

„Þetta er háttsettur hermaður, fulltrúi vopnavalds og aflsmunar auðvaldsins. Hann trúir ekki á guð, hefur enga trú á honum í velgengninni en nú er barnið hans að deyja og aðeins einn sem getur hjálpað honum og þannig er það: Í neyðinni erum við öll eins, hvar svo sem við erum sett í samfélaginu. Guð fer ekki í manngreinarálit," sagði biskup.

Heimurinn var orðinn spilavíti

Hann sagði Íslendinga hafa upplifað erfiða tíma. Kreppan hefði afhjúpað hvernig áður óþekkt ríkidæmi gæti orðið til og riðað til falls. Þjóðin hefði upplifað ótrúlega heppni í því spilavíti sem heimurinn hafi verið orðið og þar sem öllum hafi verið lofað vinningi. „Nú horfum við yfir rústirnar og þetta er óraunverulegt. Fjöldi fólks horfist í augu við að missa vinnuna, fólk hefur misst ævisparnað sinn og lífsafkomu og þetta er í námunda við okkur öll. Öll finnum við með einhverjum hætti fyrir missi og sorg og kvíða," sagði biskup.

Hins vegar væri það svo skömm þeirra sem verið hefðu hinum megin við borðið og gefið ráðin, í góðri trú áreiðanlega. „En nú er ekki tími fyrir vandlætingu og siðavendni. Við erum öll á sama báti í sömu iðuköstum, brotsjórinn bylur á okkur öllum en björgunarbáturinn er til reiðu og hefur tvær árar. Önnur er þekkingin og hin er siðgæðið," sagði herra Karl og ráðlagði að nú skyldi leggjast á þær árar til að ná landi.

Reikningar verða greiddir og sagan skrifuð

„Það er ekki meiningin að við eigum að vera upptekin af eigin hag og eigin heill. Öll erum við veitendur og þiggjendur í hinu stóra bókhaldi guðdómsins. Nú er tími umhyggju og samstöðu. Síðar kemur að tíma uppgjörsins þegar reikningar verða greiddir og sagan skrifuð," sagði biskup.

Hann sagði framtíðina sveipaða óvissumyrkri og mistök fortíðar ekki verða aftur tekin. Við hefðum aðeins það augnablik sem er núna. Því væri ráð, í stað þess að kvíða, að fela drottni fortíðina og nútíðina og horfa með honum fram á veginn. Í þeirri framtíð væri gleði, birta og lausn.