Geir á öndverðum meiði við sérfræðinga

Skoðanir Geirs Haarde forsætisráðherra á því hvaða skref þurfi að taka til að bjarga því sem bjargað verður ganga þvert á það sem sérfræðingar í efnahags- og atvinnumálum halda fram.

Þegar efnahagslíf Íslendinga er í frjálsu falli gerast þær raddir æ háværari að það eina í stöðunni sé aðstoð frá Alþjóða gjaldeyrissjóðinum. Halldór Ásgrímsson, fyrrverandi forsætisráðherra, lét þau orð falla í samtali við fréttastofu nú rétt fyrir hádegi.

Yfirmaður greiningardeildar Danske Bank sagði það sama í fréttum okkar í gær og framkvæmdastjóri Samtaka atvinnulífsins tók í sama streng í fréttum Ríksissjónvarpsins.

Fulltrúar frá sjóðnum hafa haldið til í Seðlabankanum alla þessa viku og fundað með forsætisráðherra. Það er ekki vísbending um að Íslendingar munu leita liðsinni sjóðsins ef marka má orð forsætisráðherra í viðtali við fréttamann Stöðvar 2 í gær. Þar sagði Geir að fulltrúar sjóðsins kæmu hér reglulega og oft ættu sér stað hreinskiptnar viðræður við þá. Sjóðurinn geti hugsanlega veitt lán sem sé bundið ákveðnum skilyrðum sem hann ákveði að setja. Íslensk stjórnvöld hafi hins vegar ekki tekið ákvörðun um að fara þá leið.

Stjórnvöld þeirra landa þar sem Alþjóðagjaldeyrissjóðurinn hefur þurft að grípa inn í hafa í raun orðið valdalaus. Fulltrúar sjóðsins taka við. Að þeir stígi inn með þeim hætti á Vesturlöndum á sér ekkert fordæmi og þau skilyrði sem hér yrðu sett liggja ekki fyrir. „Hins vegar eru okkar aðstæður núna frábrugðnar því sem þeir ahaf oftast verið að glíma við annars staðar," segir Geir og ítrekar að stjórnvöld hafi ekki ákveðið að leita til sjóðsins.

Hagfræðingar eru sammála um að Seðlabanki Íslands sé rúinn traustri og skipta eigi um yfirstjórn bankans. Sami tónn hefur heyrst úr herbúðum Samfylkingarinnar eftir að varaformaður flokksins lét þau orð falla á fréttavefnum Vísi í gærmorgun. Spurður hvort stjórn Seðlabankans njóti trausts segir Geir: „Að sjálfsögðu."